उपमुख्यमंत्री अजित पवार यांनी घेतले श्री नृसिंहाचे दर्शन

परभणी, दि. 26 (जिमाका) :राज्याचे उपमुख्यमंत्री अजित पवार यांनी आज पोखर्णी येथे भेट देवून श्री नृसिंहाचे दर्शन घेतले. सर्वत्र चांगला पाऊस पडू दे आणि सर्व जनतेला सुख-समृध्दी लाभू दे, अशी प्रार्थना त्यांनी यावेळी केली.

विधानपरिषद सदस्य विक्रम काळे, आमदार रत्नाकर गुट्टे, आमदार राजेश विटेकर, पोलीस अधीक्षक रवींद्रसिंह परदेशी, अपर जिल्हाधिकारी डॉ. प्रताप काळे, उपविभागीय अधिकारी दत्तु शेवाळे, तहसिलदार संदीप राजापुरे, श्री क्षेत्र नृसिंह देवस्थानचे अध्यक्ष मंचकराव वाघ व भाविक उपस्थित यावेळी उपस्थित होते.

श्री. पवार म्हणाले की, महाराष्ट्र ही साधूसंतांची भूमी आहे. येथील सर्व गड-किल्ल्यांचे संवर्धन व देवस्थानाचा विकास करण्यासाठी सहकार्य केले जाईल. श्री क्षेत्र नृसिंह देवस्थानचा विकास करण्यासही आपण कटीबद्ध आहे. येथे येणाऱ्या भाविकांसाठी पिण्याचे पाणी, स्वच्‍छतागृह व इतर मूलभूत सोयी सुविधा उपलब्ध करुन दिल्या जातील. या देवस्थानचा जिर्णोद्धार करण्यासाठी देवस्थान समिती, लोकप्रतिनिधी, गावातील प्रतिष्ठीत व्यक्ती, भाविक, पुजारी, फुल व प्रसाद विक्रेते यांनी सर्वांनी एकत्र येवून श्री नृसिंह देवस्थानचा आराखडा तयार करुन सादर करावा. या कामासाठी निधी कमी पडू देणार नाही, अशी ग्वाही त्यांनी यावेळी दिली.

0000