प्रशासकीयब्रेकिंग न्युज

लासलगाव पाटोदा रस्त्यावरील मुख्य बाजार पेठेतील पुलाचे काम दोन महिन्यात पूर्ण करा – मंत्री छगन भुजबळ

आठवडा विशेष टीम―




नाशिक,दि.२२ जून:- लासलगाव पाटोदा रस्त्यावरील परिसरातील अनेक गावांना जोडणाऱ्या लासलगाव मुख्य बाजार पेठेतील पुलाचे काम सुरू आहे. या पुलाचे काम दोन महिन्यात पूर्ण करण्यात यावे, अशा सूचना अन्न,नागरी पुरवठा व ग्राहक संरक्षण मंत्री छगन भुजबळ यांनी संबंधित अधिकाऱ्यांना दिल्या.

लासलगाव पाटोदा रस्त्यावर लासलगाव मुख्यबाजार पेठेत ४.५० कोटी निधीतून पुलाचे काम करण्यात येत आहे. या सुरू असलेल्या कामाची मंत्री श्री. भुजबळ यांनी पाहणी केली. त्यावेळी ते सबंधित अधिकाऱ्यांशी बोलत होते.

यावेळी सार्वजनिक बांधकाम विभागाचे उपअभियंता पी.आर.घोडे, अभियंता संकेत चौधरी यांच्यासह अधिकारी व पदाधिकारी उपस्थित होते.

लासलगाव पाटोदा रस्त्यावरील बाजारपेठेतील पुलाच्या कामाला पुढे साठलेल्या बंधाऱ्याच्या पाण्यामुळे कामास अडथळा येत आहे. याबाबत तातडीने या बंधाऱ्याचे द्वार उघडून द्यावे, अशी सूचना तहसीलदार विशाल नाईकवाडी व संबंधित अधिकाऱ्यांना केली. तसेच पाटोदा रस्त्यावरील हा पूल अनेक गावांना जोडणारा आहे. त्यामुळे येथील वाहतूक सुरळीत होण्यासाठी दोन महिन्याच्या आत या पुलाचे काम पूर्ण करण्यात यावे, अशा सूचना मंत्री श्री. भुजबळ यांनी संबंधित अधिकाऱ्यांना केल्या.

शिवनदी संवर्धनाच्या कामाला तातडीने कार्यारंभ आदेश द्यावा

राज्य नदी संवर्धन योजनेच्या माध्यमातून शिवनदी संवर्धनासाठी १२.५० कोटी रुपयांचा निधी मंजूर करण्यात आला असून कामाला मंजुरी मिळाली आहे. मात्र कार्यारंभ आदेश नसल्याने काम अद्याप सुरू झालेले नाही. याबाबत पाहणी दरम्यान मंत्री छगन भुजबळ यांनी महाराष्ट्र जीवन प्राधिकरण विभागाच्या अभियंत्यांशी दूरध्वनीद्वारे संपर्क करत तातडीने या कामाला कार्यारंभ आदेश देऊन काम सुरू करण्यात यावे अशा सूचना मंत्री श्री. भुजबळ यांनी दिल्या.







Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Back to top button