गडचिरोली जिल्हा

गडचिरोली:आठवडा विशेष टीम― जिल्हयात येणाऱ्या व जिल्हयातून बाहेर जावून पून्हा परत येणाऱ्या सर्व नागरिकांनी प्रशासनाने दिलेल्या सूचनांचे पालन न केल्यास आता पून्हा दंडात्मक कारवाई करण्यात येणार आहे. तसेच प्रशासनाकडून दिलेल्या निर्देशांचे पालन जसे विलगीकरण, मास्क न लावणे व गर्दी करणे याबाबत सूचनांचे पालन होत नसल्याच्या तक्रारी प्राप्त होत असल्याने, गरज पडल्यास लवकरच पून्हा संपूर्ण जिल्हयात संचार बंदी लागू करावी लागेल असे जिल्हाधिकारी दीपक सिंगला यांनी प्रसिद्धी पत्रकाद्वारे सर्व जिल्हयातील जनतेला आवाहन केले आहे.
जिल्ह्यामध्ये, कोविड-19 या संसर्गजन्य आजाराचे अनुषंगाने टाळेबंदी जाहिर करण्यात आली असून सर्व व्यक्तींना परवान्यासह आंतरराज्य, राज्यांतर्गत व आंतरजिल्हा प्रवासास मंजुरी देण्यात आली आहे. परराज्यात/राज्यांतर्गत प्रवासाकरीता https://covid19.mhpolice.in यावर ऑनलाईन अर्ज करुन ई-पास प्राप्त करुन घेण्याच्या सुचना निर्गमित करण्यात आल्या आहेत. सदरचे ई-पासचा वापर योग्य अतिमहत्वाच्या कामासाठीच करणे अपेक्षित आहे. यापुढे ई-पाससाठी योग्य कारणाशिवाय अर्ज केल्याचे/प्रवास केल्याचे निदर्शनास आल्यास संबंधित व्यक्तिंवर दंडात्मक कारवाई करण्यात येईल असे जिल्हाधिकारी यांनी पत्रकात म्हटले आहे.

यामध्ये बाहेर जिल्ह्यातून किंवा बाहेर राज्यातून विना परवाना गडचिरोली जिल्ह्यात प्रवासी वाहतूक केल्यास संबंधित वाहनाचे मालकावर रु. 1,00,000/- इतका दंड आकारण्यात येणार आहे. बाहेर जिल्ह्यातून किंवा बाहेर राज्यातून विना परवाना गडचिरोली जिल्ह्यात प्रवेश करणाऱ्या व्यक्तीवर रु. 5,000/- इतका दंड, गृह/संस्थात्मक विलगीकरण कक्षात राहण्यासाठी नेमूण दिलेला कालावधी पुर्ण होण्यापुर्वी अनधिकृतपणे बाहेर पडल्यास संबंधित व्यक्तीवर रु. 5,000/- इतका दंड तसेच फौजदारी कार्यवाही प्रस्तावित करण्यात येईल, प्रतिबंधात्मक क्षेत्रातुन (कन्टोनमेंट झोन) बेकायदेशीररित्या बाहेर पडल्यास किंवा आत आल्यास संबंधित व्यक्तीवर रु. 5,000/- इतका दंड आकारण्यात येणार असल्याचे जिल्हाधिकारी यांनी जाहिर केले आहे.
गडचिरोली जिल्ह्याबाहेरून सक्षम अधिकाऱ्याची परवानगी घेऊन गडचिरोली जिल्ह्यात प्रवेश करणाऱ्या व्यक्तिंना आरोग्य विभाग यांचेकडून दिलेल्या निर्देशानूसार 14 दिवस गृह विलगीकरण वा संस्थात्मक विलगीकरण राहणे बंधनकारक असल्याबाबत आदेश देण्यात आले आहेत. जरी एकाच दिवशी गडचिरोली जिल्ह्यातून बाहेर जाणे-येणे होणार असेल तरीही गृह/संस्थात्मक विलगीकरण करण्यात येईल व सदरचे विलगीकरण सबंधाने प्रवास्यांनी चेक पोस्ट वरील वैद्यकीय पथकातील अधिकारी/कर्मचारी याच्याशी हुज्जत घालु नये. त्या अनुषंगाने संबंधित चेक पोस्ट येथे प्रत्येक प्रवासी व्यक्तिकडून हमीपत्र घेणेत येणार आहे. तसेच वैद्यकीय पथकाकडून चेक पोस्ट वरच गृह / संस्थात्मक विलगीकरणाची कार्यवाही पुर्ण करावी अशा सूचना देण्यात आल्या आहेत. गडचिरोली जिल्ह्यात प्रवेश करणाऱ्या प्रत्येक प्रवासी व्यक्तिने स्वत: जिल्हा सामान्य रुग्णालय/उप जिल्हा रुग्णालय/प्राथमिक आरोग्य केंद्र येथे जाऊन वैद्यकीय तपासणी करुन घेणे अनिवार्य करण्यात आले आहे .

सार्वजनिक ठिकाणी थुंकताना आढळल्यास, विना मास्क/रुमाल आढळून आल्यास व योग्य कारणाशिवाय दुचाकीने एकापेक्षा जास्त व्यक्ती फिरताना आढळल्यास संबंधित व्यक्तिकडून रु. 500/- इतका दंड आकारण्यात येईल. व सबब दंड वसूल करण्यास सबंधित तहसिलदार, पोलीस निरीक्षक व मुख्याधिकारी नगर परिषद/नगर पंचायत हे सक्षम अधिकारी म्हणून नेमणुक करण्यात आली आहे.

सद्यस्थितीत गडचिरोली जिल्ह्यात ११९ कोरोनाबाधित रुग्ण आढळून आलेले आहेत. जिल्ह्यामध्ये वैद्यकीय बाबींची असलेली किमान संसाधने व खाजगी दवाखान्यात कोविड-19 च्या अनुषंगाने उपचार होणे शक्य नसल्याने सदरची परिस्थिती आटोक्यात येण्यास विलंब होत असल्याचे निदर्शनास आल्यास १००% संचार बंदीची घोषणा करावी लागेल असे संकेत जिल्हाधिकारी दीपक सिंगला यांनी दिले आहेत. याकरीता जिल्ह्यातील सर्व नागरिकांनी जिल्हा प्रशासनास सहकार्य करावे असे आवाहन जिल्हाधिकारी यांनी केले आहे.

गडचिरोली दि.८:आठवडा विशेष टीम― गडचिरोली जिल्हयात २७ मे रोजी मुंबईहून पाच जण आले. त्यातील गडचिरोली शहरातील दोन अहवाल या आगोदर पॉझिटीव्ह आले होते तर तीन निगेटीव्ह आले होते. त्यातील उर्वरीत तिघांचे दुसरे नमुने दि.६ जून रोजी तपासणीसाठी दिले होते. त्यातील एकजणाचा अहवाल (वय वर्ष २५) आज पॉझिटीव्ह आला आहे. पुर्वी पॉझिटीव्ह आलेल्या पती-पत्नीच्या कुटुंबातीलच हा सदस्य असल्याचे आरोग्य विभागाने कळविले आहे. सदर व्यक्तीला संस्थात्मक विलगीकरणात ठेवण्यात आले होते. संस्थात्मक विलगीकरणातील ५१ पैकी ४७ अहवाल पुन्हा दुस-या फेरीत निगेटीव्ह मिळाले तर एक पॉझिटीव्ह व तीन अजून येणे बाकी आहे.

गडचिरोली:आठवडा विशेष टीम― आरमोरी येथील शिवणी खुर्द या गावात दिनांक 3 जून रोजी मुंबईहून आलेले पती(वय 50वर्ष) व पत्नी (वय 40 वर्ष) यांचे कोरोना अहवाल काल रात्री उशिरा पॉझिटीव्ह आले. मुंबई येथे पती सेक्युरीटी गार्ड म्हणून काम करत होते. 3 जून रोजी ते गावात आल्यानंतर त्यांना शाळेत संस्थात्मक विलगीकरणात ठेवले होते. त्यानंतर त्यांना 4 जून रोजी आरमोरी येथील संस्थात्मक विलगीकरणात हलविण्यात आले. दिनांक 5 जून रोजी त्यांचे नमुने तपासणीसाठी नागपूर येथे पाठविण्यात आले. दिनांक 6 जूनच्या रात्री प्रशासनाकडे त्यांचे अहवाल पॉझिटीव्ह असल्याची माहिती प्राप्त झाली. त्यांना रात्री मुख्यालयातील सामान्य रूग्णालयात भरती करण्यात आले असून त्यांच्या संपर्कातील तीव्र जोखमीच्या लोकांची माहिती घेणे सुरू आहे. प्रशासनाकडून त्यांना ठेवण्यात आलेल्या ठिकाणी प्रतिबंधात्मक क्षेत्र घोषित करण्याची प्रक्रियाही सुरू करण्यात आली आहे.

*जिल्हयातील आणखी २ जण कोरोनामुक्त*
आज जिल्हयातील आणखी दोन कोविड-19 बाधित रूग्णांना बरे झाल्यानंतर दवाखान्यातून घरी सोडण्यात आले. घरी सोडण्यात आलेल्यांमध्ये धानोरा तालुक्यातील २ रुग्णांचा समावेश आहे. आज दोनजण कोरोनामुक्त झाल्यामुळे जिल्हयातील एकुण बऱ्या झालेल्या रुग्णांची संख्या २७ झाली. तर सद्या १५ कोरोना बाधितांवर दवाखान्यात उपचार सुरू आहेत. यापूर्वी एक जणाचा हैद्राबाद येथे दुदैवी मृत्यू झाला आहे. आज दोन जणांना दवाखान्यातून डीस्चार्ज देताना जिल्हा शल्य चिकित्सक डॉ.अनिल रूडे उपस्थित होते.

*मुंबई वरून आलेल्या गडचिरोली शहरातील त्या पाच पैकी बाकी तीघांचे अहवाल निगेटीव्ह*

कोरोना बाधित पती व पत्नीलाही कोणतीही लक्षणे नाहीत, उपचार प्रगतीपथावर

*दि.२७ मेला* मुंबईहून नागपूर विमानाने प्रवास करून ५ प्रवाशी गडचिरोली येथे आले. त्यापैकी ४ व्यक्तींना संस्थात्मक विलगीकरणात ठेवण्यात आले होते. यामध्ये एका कुटुंबातील तीन तर इतर वेगळे गडचिरोली शहरातील दोन प्रवाशांचा समावेश होता. त्यापैकी एक महिला गरोदर असल्याने व घरी स्वतंत्र व्यवस्था असल्याकारणाने गृह विलगीकरणात ठेवण्यात आले होते. यापैकी दोन म्हणजेच पती व पत्नी दिनांक ३ व ६ जूनला अनुक्रमे पॉझिटीव्ह आले होते. त्यातील तिसऱ्या सदस्याचा अहवाल निगेटीव्ह आला आहे. तसेच इतर दोन विमानातील सह प्रवाशांचाही अहवाल निगेटीव्ह आला आहे.
मुंबई वरून प्रवास करून आलेल्या पाच जणांचे २ जूनला नमुने घेण्यात आले होते. ३ जूनला १ अहवाल पॉझिटीव्ह तर ३ निगेटीव्ह आले. यातील निगेटीव्ह आलेले तीघेही अजूनही खबरदारी म्हणून संस्थात्मक विलगीकरणातच ठेवले आहेत. पॉझिटीव्ह आढळलेला रूग्ण ठेवण्यात आलेल्या संस्थात्मक विलगीकरणातील इतर सर्वांचे म्हणजे ५१ लोकांचे अहवाल निगेटीव्ह आले आहेत. त्यानंतर गृह विलगीकरणात ठेवलेल्या गरोदर महिलेचा अहवाल ६ जून रोजी पॉझिटीव्ह आला. त्यानंतर लगेच त्यांना सामान्य रूग्णालयात भरती करण्यात आले. त्या महिलेच्या संपर्कातील तीव्र जोखमीच्या १७ व मध्यम जोखमीच्या १६ लोकांपैकी ३ नमुने तपासणीसाठी पाठविण्यात आले होते. पैकी तीनही अहवाल सद्या निगेटीव्ह मिळाले आहेत. तर उर्वरीत नमुने घेणे सुरू आहे. त्या ठिकाणच्या आजूबाजूच्या घरांत ३ मोलकरीण होत्या. सर्व मोलकरीण पॉझिटीव्ह महिलेच्या सानिध्यात आल्या नव्हत्या मात्र त्यांना त्यांच्या घरीच खबरदारी म्हणून गृह विलगीकरणात ठेवले आहे.

सर्वांत महत्वाचे गडचिरोली शहरातील ते दांपत्य मुंबई येथेच कोरोना बाधित झाले आहे. सद्या त्यांना कोणतीही लक्षणे नसल्याचे आरोग्य विभागाने कळविले आहे. त्या दोघांबरोबर प्रवास केलेले इतर तीघे निगेटीव्ह आल्याने कोरोना पॉझिटीव्ह दोघांकडून संसर्गाचा धोका ओलंडला असल्याची शक्यता आरोग्य विभागाने वर्तविली आहे. मात्र उर्वरीत तीव्र जोखमीच्या घरातील इतर लोकांचे सर्व अहवाल प्राप्त झाल्यानंतर त्यावर शिक्कामोर्तब करता येईल असे आरोग्य विभागाने कळविले आहे.