अमोल कोल्हे

शिरूर मतदारसंघात चार सभांचा झंझावात

शिरूर दि.२४: डॉ. अमोल कोल्हे यांचा इमान छत्रपती शिवाजी महाराज, छत्रपती शंभू महाराजांशी आहे. छत्रपती शिवाजी महाराज यांनी स्वराज्याची स्थापना अठरापगड जातीतील लोकांना घेऊन केली आहे. डॉ. अमोल कोल्हेंची जात काढणाऱ्या शिवसेनेच्या उमेदवारांनी विसरू नये की डॉ. कोल्हे शिवरायांचे भक्त आहेत अशा शब्दात विरोधी पक्षनेते धनंजय मुंडे यांनी शिवसेना उमेदवार आढळराव पाटील यांना सुनावले.

शिरूर मतदारसंघाचे उमेदवार डॉ. अमोल कोल्हे यांच्या प्रचारासाठी धनंजय मुंडे यांनी आज तळेगाव ढमढेरे,मांढवगण खराटा ( तालुका शिरूर ) येथे जाहीर सभा घेतल्या त्यावेळी ते बोलत होते. डॉ.कोल्हे आणि माझी मैत्री ही जुनी आहे. कोल्हे यांनी प्रसंगी घरदार विकून छत्रपती शिवाजी महाराज, शंभूराजे यांचा इतिहास मांडला. मला अभिमान आहे की मी या सच्चा मावळ्यासाठी तुमचे आशीर्वाद मागतोय असे मुंडे म्हणाले.

मुख्यमंत्र्यांची या मतदारसंघात 2 दिवसांपूर्वी सभा झाली. त्याला गर्दी किती? तर जेमतेम. तीही २०० रुपये देऊन आणलेली.यावरून हवेचा रोख ओळखा असे मुंडे म्हणाले.डॉ.अमोल कोल्हे हा छत्रपतींचा मावळा आहे. या मावळ्याच्या गर्जनेने विरोधकांची पळता भुई थोडी झाली आहे. दिल्ली हदरवून सोडण्यासाठी या मावळ्याला लोकसभेत प्रचंड बहुमत द्या असे आवाहन त्यांनी केले.

यावेळी उमेदवार डॉ. अमोल कोल्हे, माजी आमदार अशोकबापू पवार, दिलीपराव ढमढेरे, पोपटराव गावडे, प्रदीपदादा कंद आदीसह पदाधिकारी उपस्थीत होते.

अमोल कोल्हे यांच्या प्रचारार्थ तळेगाव ढमढेरे, मांडवगण फराटा,आळंदी,आणि भोसरी येथे सभा

पुणे दि.२३: राष्ट्रवादी काँग्रेसचे स्टार प्रचारक तथा राज्याचे विरोधी पक्षनेते धनंजय मुंडे हे उद्या बुधवार दिनांक २४ एप्रिल रोजी शिरूर लोकसभा मतदारसंघातील राष्ट्रवादी काँग्रेस व आघाडीचे उमेदवार डॉक्टर अमोल कोल्हे यांच्या प्रचारार्थ एका दिवसात चार सभा घेणार आहेत.

सकाळी दहा वाजता शिरूर तालुक्यातील तळेगाव ढमढेरे येथे बाजार मैदानावर त्यांची पहिली सभा होणार आहे त्यानंतर दुपारी बारा वाजता मांडवगण फराटा येथे वाघेश्वर मंदिर परिसरात होणाऱ्या सभेला ते मार्गदर्शन करणार आहेत.

सायंकाळी साडेचार वाजता त्यांची खेड तालुक्यातील आळंदी येथे वडगाव चौकात जाहीर सभा होणार आहे.भोसरीच्या गाव जत्रा मैदानात रात्रौ आठ वाजता त्यांची चौथी जाहीर सभा होणार आहे.या लोकसभा निवडणुकीत मुंडे यांनी आत्तापर्यंत १६ लोकसभा मतदारसंघ मतदारसंघात ६७ पेक्षा जास्त सभा घेतल्या आहेत.