राज्यस्तरीय महारोजगार मेळाव्याचे आयोजन

औरंगाबाद, दिनांक 10: राज्यातील उमेदवारांना विविध क्षेत्रात या नव्याने निर्माण होत असलेल्या रोजगाराच्या संधी उपलब्ध करुन देण्यासाठी 12 ते 17 डिसेंबर या कालावधीत राज्यस्तरीय महारोजगार मेळाव्याचे आयोजन कौशल्य विकास, रोजगार व उद्योजकता विभागाच्या वतीने करण्यात आले आहे. त्या अनुषंगाने www.rojgar.mahaswayam.gov.inया वेबपोर्टलवर रोजगार मेळाव्याबाबत माहिती प्रसिद्ध असल्याची माहिती कौशल्य विकास, रोजगार व उद्योजकता विकासचे सहायक आयुक्त सं.पा.चाटे यांनी दिली आहे.

एलजी इलेक्ट्रॉनिक्स प्रा. लि., हायरॲप्लायन्सेस, महिंद्रा सीआय ई ऑटोमोटीव्ह लि., फियाट इंडिया प्रा. लि., आरएसबी ट्रान्समिशन इं. प्रा. लि., ग्रॅव्हिटी कन्स्ल्टंटस प्रा. लि., धूत ट्रान्समिशन, नवभारत फर्टिलायझर्स इ. सारख्या नामांकित कंपन्यांसह महाराष्ट्रातील सर्वच जिल्ह्या मधील कंपन्या या मेळाव्यात वेगवेगळ्या प्रकारची रिक्तपदे नोंदवत आहेत व अजूनही काही चांगल्या आस्थापना यामध्ये सहभाग नोंदविणार आहेत.

सर्वसाधारणपणे ९ वी पास पासून पुढे किंवा १०वी व १२ वी,आय.टी.आय., डिप्लोमा तसेच बी.ई. व इतर व्यावसायिक शैक्षणिक पात्रतेच्या रिक्तपदांसह सहभागी होण्यासाठी या आयुक्तालयाच्या वतीने आवाहन करण्यात आले आहे. विविध क्षेत्रातील साधारणत: किमान 25 हजार रिक्तपदे उमेदवारांसाठी उपलब्ध करुन देण्यात येणार आहेत.

सदरचा मेळावा हा केवळ ऑनलाईन पसंतीक्रम नोंदविणा-या उमेदवारांसाठीच घेण्यात येणार आहे. या संधीचा लाभ घेण्यासाठी नोकरी इच्छुक युवक-युवतींनी या विभागाच्या www.rojgar.mahaswayam.gov.in या वेबसाईटला भेट द्यावी. होमपेजवरील नोकरी साधक (Job Seekar) लॉगिनमधून आपापल्या युझर आयडी व पासवर्डच्या आधारे लॉगीन करावे. त्यानंतर पंडीत दीनदयाल उपाध्याय जॉबफेअर या बटनावर क्लिक करुन त्यातील “STATE LEVEL MEGA JOB FAIR2021” या रोजगार मेळाव्याची निवड करावी. यानंतर उद्योजकनिहाय त्यांच्याकडील रिक्तपदांची माहिती घ्यावी आणि आवश्यक पात्रताधारण करीत असल्याची खात्रीकरुन पदाची निवड करण्याची दक्षता घेऊन, उपलब्ध असलेल्या रिक्तपदासाठी ऑनलाईन पद्धतीने पसंतीक्रम नोंदवून या रोजगार मेळाव्यात सहभागी व्हावे. इच्छुक व ऑनलाईन पसंतीक्रम नोंदविणा-या उमेदवारांना त्यांच्या पसंती क्रमानुसार व उद्योजकांच्या सोईनुसार त्यांच्या मुलाखतीचे ठिकाण, दिनांक व वेळ एसएमएस, दूरध्वनी, ई-मेल किंवा सोईच्या माध्यमाद्वारे यथावकाश कळविण्यात येईल व शक्य असेल तिथे ऑनलाईन किंवा ऑफलाईन मुलाखतींचे आयोजन करण्यात येईल. इच्छुक युवक युवतींनी आपला पसंतीक्रम नोंदवून रोजगाराच्या या संधीचा निश्चित लाभ घ्यावा, असे आवाहनही श्री. चाटे यांनी केले आहे.