बीड जिल्ह्यात घडामोडींचा दिवस: राजकारण ते गुन्हेगारी, एका क्लिकवर सविस्तर बातम्या

आठवडा विशेष बीड : २१ जुलै २०२५ च्या प्रमुख बातम्या

१. सुनील तटकरेंवर पत्ते फेकल्याने राष्ट्रवादी कार्यकर्त्यांचा संताप, छावा कार्यकर्त्यांना मारहाण 

लातूरमध्ये राष्ट्रवादी काँग्रेसच्या अजित पवार गटाचे प्रदेशाध्यक्ष सुनील तटकरे यांच्यावर चावा संघटनेच्या कार्यकर्त्यांनी पत्ते फेकले. कृषीमंत्री माणिकराव कोकाटे यांच्या राजीनाम्याच्या मागणीसाठी हे पत्ते फेकण्यात आले. या घटनेनंतर अजित पवार गटाचे युवक प्रदेशाध्यक्ष सूरज चव्हाण यांच्यासह कार्यकर्त्यांनी चावा संघटनेच्या कार्यकर्त्यांना मारहाण केली, ज्यामुळे दोन्ही गटांमध्ये तुफान राडा झाला.

२. ‘वैर माझ्याशी होतं, मग बीडची बदनामी का केली?’ धनंजय मुंडेंचा विरोधकांवर निशाणा 

संतोष देशमुख प्रकरणामुळे मंत्रीपद गमावल्यानंतर पहिल्यांदाच बीडमधील राष्ट्रवादीच्या मेळाव्यात बोलताना धनंजय मुंडे यांनी विरोधकांवर जोरदार टीका केली. ‘वैर माझ्याशी होतं, मग बीडची बदनामी का केली?’ असा सवाल मुंडे यांनी उपस्थित केला. संतोष देशमुख प्रकरणात विरोधकांनी जाणीवपूर्वक आरोप केल्याचे ते म्हणाले.

३. केजमध्ये दरोड्याचे तीन आरोपी जेरबंद, एक फरार 

केज शहरात एका तरुणाला मारहाण करून त्याच्याकडील चांदीचे ब्रेसलेट, सोन्याची बाली, मोबाईल आणि रोख ८ हजार रुपये लुटणाऱ्या दरोड्यांपैकी तीन आरोपींना केज पोलिसांनी अटक केली आहे. यश महादेव हजारे या तरुणाला १२ एप्रिल रोजी मध्यरात्री १२:२० वाजता संतोष पॅलेससमोर चौघांनी लुटले होते. या दरोड्यातील विशाल उर्फ बाळा गायकवाड हा आरोपी अद्याप फरार आहे.

४. माजलगावात शासकीय ज्वारी खरेदी केंद्रावर अनियमितता, शेतकऱ्यांचे हाल 

माजलगावपासून १० किमी अंतरावर असलेल्या सावरगाव येथील शासकीय ज्वारी खरेदी केंद्र अज्ञात ठिकाणी सुरू असून, शेतकऱ्यांना ते सापडत नाहीये. अनेक शेतकऱ्यांनी ई-पीक नोंदी नसतानाही ज्वारी विकल्याचा आरोप आहे. या केंद्रावर सीसीटीव्ही, ग्रेडर किंवा आवक-जावक रजिस्टर आढळून आलेले नाही. व्यापाऱ्यांकडून कमी भावाने ज्वारी खरेदी करून ती नातेवाईकांच्या नावाने विकली जात असल्याचा आरोप शेतकऱ्यांनी केला आहे.

५. अल्पवयीन मुलीचे अपहरण, एका तरुणावर गुन्हा दाखल 

केज तालुक्यातून एका १७ वर्षे ३ महिने वयाच्या अल्पवयीन मुलीचे अपहरण झाल्याची घटना २० जुलै रोजी मध्यरात्री २:०० वाजण्याच्या सुमारास उघडकीस आली. अमर राजेभाऊ देवे (रा. सिद्धार्थ नगर, केज) या तरुणाविरुद्ध मुलीच्या आईने दिलेल्या तक्रारीवरून गुन्हा दाखल करण्यात आला आहे.

६. माजलगावात ‘सुखसागर’ हॉटेलवर पोलिसांचा छापा, जुगार खेळणारे ६ जण ताब्यात 

माजलगाव शहरातील संभाजी चौकातील हॉटेल सुखसागरवर पोलिसांनी शनिवारी रात्री छापा टाकून जुगार खेळणाऱ्या सहा जणांना पकडले. त्यांच्या ताब्यातून जुगाराचे साहित्य आणि ८ लाख ३५ हजार रुपयांचा मुद्देमाल जप्त करण्यात आला. पोलिसांनी जुगार कायद्यांतर्गत त्यांच्यावर कारवाई केली असून, या प्रकारामुळे शहरात खळबळ उडाली आहे.

७. करुणा शिक्षण संस्थेकडून बनावट अध्यक्षपदाचा मुखवटा घालून फसवणूक करणाऱ्यांवर कारवाईची मागणी 

वडगाव ददाहरी (ता. परळी) येथील करुणा शिक्षण संस्थेने कमल रघुनाथ लांडगे यांच्यावर फसवणुकीचा गुन्हा दाखल करण्याची मागणी केली आहे. लांडगे यांनी २०१९ मध्ये राजीनामा दिला असतानाही, त्या स्वतःला संस्थेची बोगस अध्यक्ष भासवून बनावट नोकरभरती जाहिराती देत असल्याचा आरोप संस्थेच्या विद्यमान पदाधिकाऱ्यांनी केला आहे.

८. महाराष्ट्रातील ६२% मंत्र्यांवर गुन्हेगारी पार्श्वभूमी: प्रा. सुशीला मोराळे 

महाराष्ट्र विधानसभेच्या अधिवेशनात नुकत्याच झालेल्या गोंधळाच्या पार्श्वभूमीवर प्रा. सुशीला मोराळे यांनी चिंता व्यक्त केली आहे. ‘असोसिएशन फॉर डेमोक्रॅटिक रिफॉर्म्स’ने केलेल्या सर्वेक्षणानुसार, राज्यातील महायुती सरकारमधील ६२ टक्के मंत्री गुन्हेगारी पार्श्वभूमीचे आहेत. मंत्रिमंडळातील ४२ पैकी २६ मंत्र्यांवर विविध स्वरूपाचे गुन्हे दाखल आहेत, ज्यात खुनाचा प्रयत्न आणि महिलांशी संबंधित गुन्हे यांचा समावेश आहे.

९. कृषीमंत्री माणिकराव कोकाटे जुगाराच्या पिकात व्यस्त, मनसेचा हल्लाबोल 

कृषीमंत्री माणिकराव कोकाटे यांचा विधिमंडळात ऑनलाइन रमी खेळतानाचा व्हिडिओ व्हायरल झाल्यानंतर मनसेने त्यांच्यावर जोरदार टीका केली आहे. ‘कृषीमंत्री महाराष्ट्रात जुगाराचं पीक पेरण्यात व्यस्त आहेत, त्याची फळं महाराष्ट्रातील तरुण आणि बळीराजा भोगत आहे,’ अशी टीका मनसेने केली आहे. राष्ट्रवादी काँग्रेसचे आमदार रोहित पवार यांनीही कोकाटे यांच्यावर खोचक टीका केली आहे.

१०. बीड रेल्वेपुलाच्या कामात जनतेच्या पैशांचा चुराडा, दोषींवर कारवाईची मागणी 

अहिल्यानगर-बीड रेल्वेमार्गावरील चहाटा रोडवरील पालवण फाटा येथील रेल्वे पूल चुकीच्या दिशेने बांधल्याने निरुपयोगी ठरला असून, तो पाडण्याचे काम सुरू झाले आहे. यावर सामाजिक कार्यकर्ते डॉ. गणेश ढवळे यांनी जनतेच्या पैशांचा प्रचंड अपव्यय झाल्याचा आरोप केला आहे. रेल्वे सुरक्षा आयुक्तांकडून दोषी अभियंता आणि ठेकेदारांवर कारवाई टाळली जात असल्याचा आरोपही त्यांनी केला आहे.

११. नरसिम्हागडावरील विकासकामांचा आमदार संदीप क्षीरसागर यांच्याकडून आढावा 

आमदार संदीप क्षीरसागर यांनी रविवारी श्री क्षेत्र नरसिम्हागड येथे सुरू असलेल्या विविध विकासकामांची पाहणी करून आढावा घेतला. त्यांनी श्री नगदनारायण महाराजांच्या समाधीचे दर्शन घेऊन महंत शिवाजी महाराज यांचे आशीर्वाद घेतले. नरसिम्हागड हे त्यांच्या राजकीय आणि सामाजिक जीवनाची सुरुवात असल्याचे क्षीरसागर म्हणाले.

१२. पंकजा मुंडे यांच्या वाढदिवसानिमित्त बीडमध्ये वृक्षारोपण आणि कापडी पिशव्यांचे वाटप 

राष्ट्रीय नेत्या पंकजाताई मुंडे यांच्या वाढदिवसानिमित्त सुरू असलेल्या ‘सेवा पंधरवाडा’ उपक्रमांतर्गत बीड शहरातील डॉ. बाबासाहेब आंबेडकर चौकात पर्यावरणपूरक जनजागृती कार्यक्रम घेण्यात आला. या कार्यक्रमात कापडी पिशव्यांचे मोफत वाटप करून ‘प्लॅस्टिकमुक्त बीड’चा निर्धार करण्यात आला. महर्षी कनाड शाळेच्या परिसरात विद्यार्थ्यांसह वृक्षारोपणही करण्यात आले.

१३. गेवराईमध्ये अतिक्रमण हटाव मोहीम, व्यापाऱ्यांच्या डोळ्यात अश्रू 

गेवराई शहरातील शाखे चौक आणि छत्रपती शिवाजी महाराज चौकात पालिका प्रशासनाने अचानक अतिक्रमण हटाव मोहीम राबवली. कोणतीही पूर्वसूचना न देता केलेल्या या कारवाईमुळे लहान व्यावसायिक आणि फळ विक्रेत्यांचे मोठे नुकसान झाले. मुख्याधिकारी विक्रम मांडुरके यांच्या कारवाईवर प्रश्नचिन्ह उपस्थित केले जात आहे, कारण राजकीय पुढारी आणि मोठ्या दुकानांचे अतिक्रमण दुर्लक्षित केल्याचा आरोप आहे.

१४. अहिल्यादेवी होळकर यांच्यावर आक्षेपार्ह बोलणाऱ्यावर कारवाईची मागणी 

राजमाता पुण्यश्लोक अहिल्यादेवी होळकर यांच्याविषयी फेसबुकवर आक्षेपार्ह भाषेत टीका करणाऱ्या सुनील गोपाळराव उभय या व्यक्तीवर गुन्हा दाखल करून त्याला अटक करण्याची मागणी माजलगाव तालुका सकल धनगर समाज बांधवांनी केली आहे. आरोपीवर कडक कारवाई न झाल्यास राज्यभर आंदोलन छेडण्याचा इशाराही देण्यात आला आहे.

१५. राष्ट्रवादी काँग्रेसच्या परळी विधानसभा अध्यक्षपदी गोविंद देशमुख यांची फेरनियुक्ती 

राष्ट्रवादी काँग्रेस पक्षाच्या परळी विधानसभा अध्यक्षपदी धनंजय मुंडे यांचे विश्वासू गोविंद देशमुख यांची पुन्हा नियुक्ती करण्यात आली आहे. तसेच तालुकाध्यक्षपदी वैजनाथ सोळंके आणि शहराध्यक्षपदी बाजीराव धर्माधिकारी यांची नियुक्ती करण्यात आली आहे. प्रदेशाध्यक्ष सुनील तटकरे आणि आमदार धनंजय मुंडे यांच्या उपस्थितीत बीड येथे झालेल्या पदाधिकारी संवाद मेळाव्यात ही नियुक्तीपत्रे देण्यात आली.

१६. ऐतिहासिक कारंजा टॉवर हिरवाईने नटू लागले 

बीड शहरातील ऐतिहासिक कारंजा टॉवरची पूर्वीची दुरवस्था आता हळूहळू दूर होत आहे. अनेक नागरिक आणि सामाजिक कार्यकर्ते या वास्तूला आकर्षक आणि मनमोहक बनवण्यासाठी पुढाकार घेत आहेत. रमेशराव गंगाधर आणि युवा नेते झुंजार पांडे यांच्यासह अनेकांनी येथे वृक्षारोपण केले आहे, ज्यामुळे ही ऐतिहासिक वास्तू हिरवीगार दिसू लागली आहे.

१७. परळीत संस्कार प्राथमिक शाळेत पालक सुसंवाद मेळावा उत्साहात संपन्न 

परळी शहरातील पद्मावती शिक्षण संस्था संचालित संस्कार प्राथमिक शाळेत इयत्ता चौथीच्या विद्यार्थ्यांसाठी पालक सुसंवाद मेळावा उत्साहात पार पडला. श्री पद्मावती शिक्षण संस्थेचे अध्यक्ष कैलास तांदळे यांच्या अध्यक्षतेखाली आणि सचिव दीपक तांदळे यांच्या प्रमुख उपस्थितीत हा मेळावा झाला. विद्यार्थ्यांच्या सर्वांगीण विकासासाठी शिक्षक, पालक आणि विद्यार्थी यांच्यातील संवाद महत्त्वाचा असल्याचे दीपक तांदळे यांनी सांगितले.

१८. बीडच्या रस्त्यांवरील खड्ड्यांवरून नागरिकांचा संताप, पालिकेसमोर आंदोलन 

बीड शहरातील रस्त्यांवरील खड्ड्यांविरोधात नागरिक आक्रमक झाले आहेत. छत्रपती शिवाजी महाराज चौक ते बशीरगंज चौक, राजुरीवेस-कारंजा-जुना बाजार-बांदगी चौक, तसेच राजुरीवेस-बुंदेलपुरा-कबाइली माळीवेस आणि बलभीम चौक-धोंडीपुरा माळीवेस या मार्गांवरील खड्ड्यांच्या प्रश्नावर आज दुपारी ‘क्या बोलती बीड की मालीक’ फेम शेबु खान यांच्यासह युवकांनी आंदोलन केले. नगर पालिकेसमोर “बीडची पब्लिक परेशान आहे, सो रहे सो रहे, नगर पालिकावाले सो रहे…” अशा घोषणा देत नागरिकांनी आपला रोष व्यक्त केला. याबाबत जिल्हाधिकाऱ्यांकडे निवेदनही देण्यात आले आहे.

१९. शिवसेनेकडून खड्ड्यांचे नामकरण ‘पालकमंत्री’, प्रशासनावर टीका 

बीड शहरातील खड्ड्यांच्या मुद्द्यावरून शिवसेना (उद्धव बाळासाहेब ठाकरे पक्ष) आक्रमक झाली आहे. शिवसैनिकांनी छत्रपती शिवाजी महाराज चौक ते राजुरीवेस मार्गावरील एका मुख्य खड्ड्याला ‘पालकमंत्री’ असे नाव दिले. उर्वरित खड्डे पालकमंत्र्यांची ‘लाभार्थी पिलावळ’ असल्याची उपरोधिक टीका शिवसेना जिल्हाप्रमुख उल्हास गिराम यांनी केली. बीड शहर उघडे रोहित्र, उघड्या नाल्या, कचऱ्याचे ढिगारे आणि पाणी नियोजनाच्या अभावामुळे मरणयातना भोगत असल्याचा आरोप गिराम यांनी केला. पालकमंत्र्यांनी बीडची बारामतीप्रमाणे काळजी घ्यावी, अशी अपेक्षाही त्यांनी व्यक्त केली.

२०. जिल्हा हिवताप कार्यालयातील नियुक्ती घोटाळा चव्हाट्यावर, सुरेश धसांनी आवाज उठवला 

बीड जिल्हा हिवताप कार्यालयातील नियुक्ती प्रक्रियेत मोठा गैरव्यवहार झाल्याचा आरोप होत आहे. जिल्हा हिवताप अधिकारी शिंदे आणि आरोग्य सेवक सानप यांनी नियमांना धाब्यावर बसवून विशिष्ट समाजातील उमेदवारांना नियुक्तीपत्रांचे ‘बूस्टर डोस’ दिल्याचे समोर आले आहे. आमदार सुरेश धस यांनी याप्रकरणी आवाज उठवत सर्व विभागांमधील भरती रोस्टर पद्धतीनुसार झाली आहे का, याची तपासणी करण्याची मागणी अधिवेशनात केली होती. या घोटाळ्याची सखोल चौकशी झाल्यास मोठा भ्रष्टाचार समोर येईल, अशी शक्यता वर्तवली जात आहे.