बीड शहरात ‘घड्याळ’ फुटणार आणि ‘तूतारी’ वाजणार; आंबेडकरी चळवळीची वज्रमूठ स्मिता वाघमारेंच्या पाठीशी!
बीड, २४ नोव्हेंबर (विशेष प्रतिनिधी): बीड नगरपरिषदेच्या निवडणुकीच्या तोंडावर शहरातील राजकीय वातावरण ढवळून निघाले आहे. मागील काही काळापासून उमेदवारी डावलल्यामुळे नाराज असलेल्या आंबेडकरी चळवळीतील प्रमुख नेत्यांनी आणि कार्यकर्त्यांनी आता आक्रमक भूमिका घेतली आहे. रविवारी पार पडलेल्या एका निर्णायक बैठकीत, सत्ताधारी गटाच्या ‘घड्याळ’ चिन्हाचा पराभव करून राष्ट्रवादी काँग्रेस पक्ष (शरदचंद्र पवार) यांच्या ‘तुतारी’ चिन्हासह उमेदवार स्मिता विष्णू वाघमारे यांना विजयी करण्याचा एकमुखी निर्णय घेण्यात आला आहे. या निर्णयामुळे बीडमधील राजकीय गणिते पूर्णपणे बदलली असून, याचा मोठा फटका अजित पवार गट आणि भाजप युतीला बसण्याची शक्यता निर्माण झाली आहे.
बीड शहरात आंबेडकरी चळवळीचे नेते पप्पू कागदे आणि अजिंक्य चांदणे यांच्या नेतृत्वाखाली ही महत्त्वाची बैठक आयोजित करण्यात आली होती. या बैठकीत समाजावर होणारा अन्याय, राजकीय पक्षांकडून उमेदवारी देताना होणारी फसवणूक आणि जातीयवादी शक्तींचा वाढता प्रभाव यावर सविस्तर चर्चा करण्यात आली. यावेळी उपस्थितांना संबोधित करताना पप्पू कागदे यांनी अत्यंत आक्रमक पवित्रा घेतला. ते म्हणाले की, राजकीय पक्षांनी खऱ्या आंबेडकरवाद्यांना जाणीवपूर्वक डावलले आहे. पाठीत खंजीर खुपसून ताटाखालचे उमेदवार उभे करून जनतेची दिशाभूल करण्याचा प्रयत्न सुरू आहे. या प्रवृत्तीला ठेचून काढण्यासाठी आता आंबेडकरी समाजाने एकत्र येण्याची गरज आहे.
या बैठकीत ‘घड्याळ फोडा, तुतारी वाजवा’ असा नारा देण्यात आला. पप्पू कागदे यांनी यावेळी भीमसैनिकांना आवाहन केले की, निळा झेंडा, स्वाभिमान आणि आंबेडकर चळवळ डोळ्यासमोर ठेवून जातीयवाद्यांना धडा शिकवा. जो निर्णय घेण्यात आला आहे, तो केवळ राजकीय नसून स्वाभिमानाच्या रक्षणासाठी आहे. खऱ्या ‘भीमकन्या’ असलेल्या स्मिता वाघमारे यांना नगराध्यक्षपदी निवडून आणण्यासाठी सर्वांनी ताकदीने कामाला लागावे, असे आवाहनही त्यांनी केले. या निर्णयामुळे राष्ट्रवादी काँग्रेस (श.प.) पक्षाचे स्थानिक नेते आणि आमदार संदीप क्षीरसागर यांची बाजू भक्कम झाली आहे, तर दुसरीकडे आमदार विजयसिंह पंडित आणि आमदार संदीप क्षीरसागर यांच्यातील लढतीत आता ‘तुतारी’चे पारडे जड मानले जात आहे.
अजिंक्य चांदणे यांनी देखील यावेळी आपली भूमिका स्पष्ट केली. ते म्हणाले की, आम्ही महाविकास आघाडीसोबत आहोत, त्यामुळे नगराध्यक्षपदावर आमचा दावा होता. आम्हाला उमेदवारी नाकारली गेली, याचे दुःख नाही, पण आंबेडकरी समाजाच्या हितासाठी समाज जो निर्णय घेईल, त्याच्याशी आम्ही ठाम आहोत. ही निवडणूक सर्व ताकदीनिशी लढवून स्मिता वाघमारे यांना विजयी करू. स्वतःची राजकीय महत्त्वाकांक्षा बाजूला ठेवून समाजाच्या हक्काचे रक्षण करण्यासाठी आम्ही हा निर्णय घेतला आहे, असेही चांदणे यांनी स्पष्ट केले. आजच्या स्थितीत पुरोगामी कोण आहे, याची शंका येत असताना, ज्यांनी आम्हाला आणि आमच्या समाजाला डावलले, त्यांची मस्ती जिरवल्याशिवाय आम्ही राहणार नाही, असा इशाराही त्यांनी दिला.
यावेळी भाजपच्या नगराध्यक्ष पदाच्या उमेदवार डॉ. ज्योती घुंबरे यांच्यावरही सडकून टीका करण्यात आली. पप्पू कागदे यांनी सवाल उपस्थित केला की, डॉ. घुंबरे यांना एससी म्हणून निवडणुकीत उतरवण्यात आले आहे, पण त्यांचे आंबेडकरी चळवळीतील योगदान काय आहे? चळवळीचे सोडा, पण त्यांना कोणी भीमनगरमध्ये कधी पाहिले आहे का? केवळ मतांसाठी ‘बुद्धीभेद’ करणाऱ्या उमेदवारांपासून सावध राहा, असे आवाहन त्यांनी मतदारांना केले.
या बैठकीतील निर्णयाचा अन्वयार्थ लावल्यास, बीड नगरपालिकेत आता सरळ लढत होण्याची चिन्हे आहेत. मागासवर्गीय प्रवर्गातील महिलेला आरक्षण सुटल्यानंतर राष्ट्रवादी काँग्रेस अजित पवार गटाकडून पप्पू कागदे यांची उमेदवारी निश्चित मानली जात होती. परंतु, ऐनवेळी उमेदवारी बदलल्यामुळे आंबेडकरी समाजात मोठा रोष निर्माण झाला होता. त्याचाच परिणाम म्हणून आज सर्व आंबेडकरी समाज आणि नेते राष्ट्रवादी काँग्रेस (शरदचंद्र पवार) पक्षाच्या पाठीशी उभे राहिले आहेत.
या एकत्रीकरणामुळे बीड शहरात ‘तुतारी’चा आवाज घुमणार, असा विश्वास कार्यकर्त्यांमधून व्यक्त होत आहे. आता प्रत्यक्ष मतदानात या ‘वज्रमुठी’चा किती प्रभाव पडतो, हे पाहणे औत्सुक्याचे ठरणार आहे.