शरद पवार उद्या बीडच्या दुष्काळी दौऱ्यावर ; जळालेल्या फळबागांची पाहणी करणार

बीड : आठवडा विशेष टीम― राष्ट्रवादी काँग्रेस पार्टीचे अध्यक्ष शरद पवार हे उद्या सोमवारी बीड जिल्ह्याच्या दौर्‍यावर येणार आहेत. या दौर्‍यात ते बीड जिल्ह्यात दुष्काळामुळे निर्माण झालेल्या पार्श्‍वभूमीवर जिल्ह्यातील शेतकरी, दुष्काळी जनतेशी संवाद साधणार आहेत. तसेच जनावरांच्या छावण्यांना भेट आणि जळालेल्या फळबागांची पहाणीही करणार आहेत. विरोधी पक्षनेते धनंजय मुंडे यांच्यासह जिल्ह्यातील पदाधिकारी यावेळी त्यांच्या समवेत उपस्थित राहणार आहेत.

खा. पवार यांचे सकाळी १०.३० वाजता आष्टी तालुक्यातील खडकत येथे आगमन होणार आहे, तेथे ते शेतकर्‍यांशी संवाद साधणार आहेत, त्यांच्या अडचणी जाणुन घेणार आहेत. त्यानंतर सकाळी ११.४५ वाजता पाटोदा तालुक्यातील सौताडा येथील एका चारा छावणीस ते भेट देणार आहेत. दुपारी ०१.१५ वाजता ते नवगण राजुरी, जि.बीड येथील गुरांच्या छावणीस भेट देऊन त्यानंतर पत्रकारांशी संवाद साधणार आहेत. दुपारी ०३.३० वाजता ते पिंपळवंडी, ता.पाटोदा येथील गुरांच्या छावणीस भेट देणार आहेत, तसेच काही जळालेल्या फळबागांची पहाणी ही करणार असून, त्यानंतर बारामतीकडे रवाना होणार आहेत.

या दौर्‍यात त्यांच्या समवेत धनंजय मुंडे, अमरसिंह पंडित, बजरंग सोनवणे, बाळासाहेब आजबे, युवा नेते संदिप भैय्या क्षीरसागर, सतिश शिंदे यांच्यासह जिल्ह्यातील पदाधिकारी उपस्थित राहणार आहेत. बीड जिल्ह्यात यावेळी भीषण दुष्काळी परिस्थिती निर्माण झाली असून शेतकर्‍यांशी संवाद साधण्यासाठी खासदार शरद पवार स्वतः शेतकर्‍यांच्या बांधावर जाणार आहेत.