बीड: श्रीक्षेत्र बेलेश्वर संस्थानात महाशिवरात्रीचा उत्साह; महादेवाच्या दर्शनासाठी भाविकांची मांदियाळी

बीड, १५ फेब्रुवारी (विशेष प्रतिनिधी): बीड तालुक्यातील बालाघाटावरील लिंबागणेश पंचक्रोशीत असलेल्या बेलगाव येथील श्रीक्षेत्र बेलेश्वर मंदिरात महाशिवरात्रीनिमित्त रविवारी भाविकांचा मोठा जनसागर लोटला. परिसरातील हजारो भाविकांनी बेलेश्वर महादेवाच्या दर्शनासाठी पहाटेपासूनच मोठी गर्दी केली होती.

महाशिवरात्रीच्या पावन पर्वानिमित्त मंदिराच्या गाभाऱ्यात, तसेच दर्शन मंडप आणि संपूर्ण मंदिर परिसरात फुलांच्या आकर्षक माळा आणि लक्षवेधी विद्युत रोषणाई करण्यात आली होती. यामुळे मंदिराचे रूप अधिकच विलोभनीय दिसत होते. दर्शनासाठी आलेल्या भाविकांनी संस्थानचे मठाधिपती महंत महादेव भारती महाराज आणि शांतीब्रम्ह तुकाराम भारती महाराज यांचे दर्शन घेऊन त्यांचे आशीर्वाद घेतले.

यात्रेच्या निमित्ताने मंदिर परिसरात जाणाऱ्या रस्त्यावर विविध व्यावसायिकांनी आणि खेळण्यांची दुकाने थाटली होती. महाशिवरात्रीचा उपवास असल्याने स्थानिक मंडळे आणि स्वयंसेवकांच्या वतीने भाविकांसाठी साबुदाणा खिचडी आणि केळीचे मोफत वाटप करण्यात आले.

वाढती गर्दी लक्षात घेता कोणताही अनुचित प्रकार घडू नये यासाठी लिंबागणेश पोलीस चौकीच्या वतीने चोख बंदोबस्त ठेवण्यात आला होता. सहाय्यक फौजदार विठ्ठल राठोड, गणेश परझने यांच्यासह होमगार्डचे जवान मंदिर परिसरात सुरक्षेसाठी तैनात होते.

महाशिवरात्रीचे औचित्य साधून मंदिरात सध्या अखंड हरिनाम सप्ताहाचे आयोजन करण्यात आले आहे. या सप्ताहाची सांगता सोमवार, दिनांक १६ फेब्रुवारी रोजी होणार आहे. यानिमित्ताने शांतीब्रम्ह तुकाराम भारती महाराज यांचे सुश्राव्य कीर्तन पार पडेल. कीर्तनानंतर भाविकांसाठी महाप्रसादाचे वाटप केले जाणार आहे. परिसरातील सर्व भाविकांनी या कीर्तन आणि महाप्रसादाचा मोठ्या संख्येने लाभ घ्यावा, असे जाहीर आवाहन बेलेश्वर संस्थानच्या वतीने करण्यात आले आहे.