दिल्ली/वृत्तसंस्था:आठवडा विशेष टीम― महाराष्ट्रातील विधानसभेचे सध्याचे विरोधी पक्षनेते देवेंद्र फडणवीस सध्या भारताची राजधानी असलेल्या दिल्लीत आहेत. शुक्रवारी दिल्लीत दाखल झालेल्या देवेंद्र फडणवीस यांनी गृहमंत्री अमित शाह यांच्यासह मंत्र्यांच्या भेटी घेतल्या असल्याचे सूत्रांकडून समजते. दिल्लीतून एक मोठी बातमी समोर आली आहे. भाजपच्या राष्ट्रीय कार्यकारणीमध्ये पंकजा मुंडे ,विनोद तावडे या दिग्गज नेत्यांसह शेलार व निलंगेकर यांना देखील स्थान मिळण्याचं निश्चित झाले आहे. याबाबत सूत्रांकडून विशेष माहिती मिळत आहे. भाजप अध्यक्ष जे.पी. नड्डा यांच्यासोबत आज देवेंद्र फडणवीस यांची भेट होणार असल्याची देखील चर्चा आहे.
दरम्यान , एकनाथ खडसे, विनोद तावडे, प्रकाश मेहता या नेत्यांना कार्यकारणीत फक्त विशेष निमंत्रित म्हणून स्थान देण्यात आले आहे. तर महाराष्ट्र राज्याच्या रणरागिणी म्हणून ओळखल्या जाणाऱ्या पंकजा गोपिनाथ मुंडे यांना केंद्रात संधी मिळणार असल्याचे त्यावेळी सांगण्यात आले होते. त्यानंतर आता पंकजाताई मुंडे यांची भारतीय जनता पार्टीच्या राष्ट्रीय कार्यकारिणीत निवड होत असल्याची माहिती सुत्रांकडून मिळत आहे.