अंबाजोगाई तालुक्यात “मिशन झिरो डेथ” मोहिमेअंतर्गत घरोघरी जाऊन आरोग्य तपासणी ; शिक्षक,आशा स्वयंसेविका,अंगणवाडी ताई करताहेत ग्रामीण आरोग्याची माहिती संकलित

अंबाजोगाई:आठवडा विशेष टीम―
“मिशन झिरो डेथ” मोहिमेअंतर्गत अंबाजोगाई तालुक्यात घरोघरी जाऊन शिक्षक,आशा स्वयंसेविका,अंगणवाडी ताई हे आरोग्य तपासणी करीत आहेत.त्यामुळे आता ग्रामीण आरोग्याची माहिती संकलित होणार असून या माहिती आधारे कोविड संसर्ग रोखण्यास मदत होणार आहे.या मोहीमे चा पहिला टप्पा पुर्णत्वाकडे जात आहे अशी माहिती अंबाजोगाईचे गटशिक्षण अधिकारी चंदन कुलकर्णी यांनी दिली आहे.

बीड जिल्ह्यात कोरोना रूग्णांची संख्या मोठ्या प्रमाणावर वाढत असल्याने बीड जिल्हा परिषदेचे मुख्य कार्यकारी अधिकारी अजित कुंभार यांनी “मिशन झिरो डेथ” हा उपक्रम राबविण्याचा निर्णय घेतला आहे.तात्काळ त्यांनी शिक्षक,आशा स्वयंसेविका आणि अंगणवाडी ताई सर्वेक्षण करण्याच्या सूचना दिल्या आहेत.यामुळे सोमवार,दिनांक १९ एप्रिल २०२१ पासून ते १० मे २०२१ या कालावधीत ६० ग्रामसेवक,१११० शिक्षक,शिक्षीका व शिक्षकेत्तर कर्मचारी,२५१ आंगणवाडी ताई,१८८ आशा स्वयंसेविका मिळून संयुक्तपणे अंबाजोगाई तालुक्यातील ग्रामीण भागातील ३७,९१५ कुटुंबांचे व १ लाख ९१ हजार ११६ एवढ्या लोकसंख्येचे सर्वेक्षण करणार आहेत.हे सर्वेक्षण तीन टप्प्यांत होणार आहे.अंबाजोगाई तालुक्यातील ११२ गावातून प्रत्येकाच्या घरोघरी जाऊन प्रत्येक कुटुंबातील सदस्यांच्या आरोग्याची माहिती घेऊन नोंदी घेत आहेत.यामुळे लवकरच ग्रामीण भागातील जनतेच्या आरोग्याची खरी वस्तुस्थिती समोर येऊन यामुळे आरोग्य विभागास मदत होणार आहे.मागील काही दिवसांपासून अंबाजोगाई तालुक्यात दररोजच दिडशेच्यावर कोरोना संसर्ग झालेले रूग्ण आढळून येत आहेत.त्यामुळे कोरोना संसर्गाची साखळी तोडून रूग्णांची संख्या कमी करण्यासाठी प्रशासकीय पातळीवर सर्वोतोपरी प्रयत्न केले जात आहेत.ग्रामीण भागात कोरोनाचा संसर्ग वाढू नये,यासाठी बीड जिल्हा परीषदेचे मुख्यकार्यकारी अधिकारी अजित कुंभार यांनी “मिशन झिरो डेथ” ही मोहीम राबवून प्रत्येक कुटुंबाच्या आरोग्याची माहिती घेण्यासाठी शिक्षकांची नियुक्ती केली आहे.हे शिक्षक त्या गावातील आशा स्वयंसेविका व अंगणवाडी ताई यांच्या मदतीने घरोघरी जाऊन कुटूंब प्रमुखाकडून कुटूंबातील प्रत्येकाची आरोग्य विषयक माहिती घेत आहेत.या सर्वेक्षणात कोणास काही आजार आहे का ? असल्यास या बाबतची नोंद केली जात आहे.रूग्ण व त्याचा सहवासीत याची तसेच सर्दी,ताप,खोकला आदी लक्षणे,इतर कोणते आजार आहेत काय.? असल्यास औषधोपचार सुरू आहेत काय.नागरिकांची ऑक्सिजन पातळी तपासण्यात येत आहे.तसेच कोविड प्रतिबंधक लस घेतली का ? अशी विचारणा करून कुटूंबात कुणी कोविड पॉझिटिव्ह आहेत का.असल्यास उपचार कुठे सुरू आहेत,बाधित कुटूंबिय व इतर सदस्य हे होम आयसोलेशनचे नियम पाळतात का याबाबत ची माहिती घेण्यात येऊन होम आयसोलेशन असलेल्या घरावर स्टिकर लावण्यात येत आहेत.यामुळे ग्रामीण भागातील नागरिकांच्या आरोग्याची माहिती प्रशासनाच्या समोर येणार आहे.ग्रामीण भागात कोरोना लसीकरणाबाबत जनजागृती करण्यात येत आहे.तर सध्या ग्रामीण भागात ही लस उपलब्ध करून देण्यात येत आहे.प्रशासन लसीकरणाचे प्रमाण वाढविण्याचे उद्दिष्ट समोर ठेवून काम करीत आहेत.

सर्वेक्षणाकरीता सहकार्य करावे
=============
बीड जिल्ह्यात कोरोना रूग्णांची संख्या मोठ्या प्रमाणावर वाढत असल्याने बीड जिल्हा परिषदेचे मुख्य कार्यकारी अधिकारी अजित कुंभार यांनी “मिशन झिरो डेथ” हा उपक्रम राबविण्याचा निर्णय घेतला आहे.तात्काळ त्यांनी शिक्षक,आशा स्वयंसेविका आणि अंगणवाडी ताई यांच्या संयुक्त पथकाद्वारे सर्वेक्षण करण्याच्या सूचना दिल्या आहेत.त्यानुसार अंबाजोगाई तालुक्यात गटविकास अधिकारी डॉ.संदिप घोणसीकर यांचे मार्गदर्शनाखाली सर्व ग्रामसेवक,गटशिक्षण अधिकारी चंदन कुलकर्णी यांचे मार्गदर्शनाखाली सर्व शिक्षक,शिक्षिका व शिक्षकेतर कर्मचारीवृंद,डॉ.बालासाहेब लोमटे यांचे मार्गदर्शनाखाली आशा स्वयंसेविका आणि महिला व बालविकास प्रकल्प अधिकारी हुंडेकर यांचे मार्गदर्शनाखाली सर्व अंगणवाडी ताई यांच्या संयुक्त योगदानातून मुख्य कार्यकारी अधिकारी अजित कुंभार यांनी दिलेल्या दिशादर्शक सूचनांचे पालन करून अंबाजोगाई तालुक्यात “मिशन झिरो डेथ” ही मोहीम प्रभावीपणे राबविणे सुरू आहे.संशयित रूग्णांचे गावातच होम आयसोलेशन करणे,सहव्याधी,वयोवृद्ध,मधुमेह आणि उच्च रक्तदाब असणारांना गरजेनुसार अँटीजेन व आरटीपिसीआर टेस्ट करून त्यांना तात्काळ पुढील उपचारांसाठी संदर्भ सेवा पुरविण्यात येत आहे.ही मोहीम राबविण्यात आल्याने ग्रामीण भागातील बाधित रूग्णांचा शोध घेणे शक्य होत आहे.त्यामुळे सर्वेक्षणाकरीता जनतेने सहकार्य करावे.

– चंदन कुलकर्णी
(गटशिक्षण अधिकारी,अंबाजोगाई.)