धुळे

धुळे, दि.२८:आठवडा विशेष टीम― आगामी सण, उत्सव तसेच कोरोना विषाणूचा प्रादुर्भाव होवू नये म्हणून लॉकडाऊन करण्यात आला आहे. या पार्श्वभूमीवर धुळे जिल्ह्यात 28 मे ते 11 जून 2020 या कालावधीत मुंबई पोलिस कायदा कलम 37 (1) (3) चे प्रतिबंधात्मक आदेश जिल्हादंडाधिकारी तथा जिल्हाधिकारी संजय यादव यांनी लागू केले आहेत.
जिल्ह्यात कायदा व सुव्यवस्था राखण्याकामी पोलिसांना मदत व्हावी, पोलिस अधीक्षक, धुळे यांनी सादर केलेला अहवाल पाहता जिल्ह्यातील कायदा व सुव्यवस्था अबाधित राहण्यासाठी व परिस्थितीवर नियंत्रण ठेवण्यासाठी पोलिसांना मदत व्हावी म्हणून जिल्हादंडाधिकारी तथा जिल्हाधिकारी श्री. यादव यांनी त्यांना मुंबई पोलिस अधिनियमानुसार प्राप्त अधिकाराचा वापर करून जिल्ह्यातील कोणत्याही इसमास पुढील कृत्य करण्यास मनाई करण्यात आली आहे. त्यात सोटे, तलवारी, बंदुका, भाले, सुरे, लाठ्या किंवा शारीरिक दुखापती करण्यासाठी वापरात येतील, अशी कोणतीही हत्यारे अथवा वस्तू बरोबर घेवून फिरणे, अंग भाजून टाकणारा कोणताही दाहक पदार्थ किंवा स्फोटक पदार्थ किंवा द्रव्ये बरोबर घेवून फिरणे, दगड अगर अस्त्रे सोडावयाची अगर फेकण्याची हत्यारे, साधने इत्यादी तयार करणे, जमा करणे आणि बरोबर नेणे, सार्वजनिक शांतता धोक्यात येईल, अशी भाषणे करणे, हावभाव करणे अथवा सोंग आणणे, जाहीरपणे घोषणा करणे, गाणे म्हणणे, वाद्य वाजविणे, कोणत्याही व्यक्तीची आकृती किंवा प्रतिमेचे प्रदर्शन करणे.
सभा घेण्यास, मिरवणूक काढण्यास, पाच किंवा पाचपेक्षा अधिक व्यक्ती एकत्र येण्यास मनाई करण्यात आली आहे. संबंधित उपविभागीय पोलिस अधिकारी यांनी दिलेल्या परवानगीशिवाय काढण्यात आलेले मोर्चे, रॅली, सभा. मुंबई पोलिस अधिनियम 1951 चे कलम 37 (1) (3) हा आदेश ज्यांना लाठी अगर तत्सम वस्तू घेतल्याशिवाय चालता येत नाही, अशा अपंग व्यक्तींना लागू नाही. तसेच शासनाच्या सेवेतील व्यक्तींना आपल्या वरिष्ठांच्या आदेशानुसार कर्तव्यपूर्तीसाठी हत्यार बाळगणे आवश्यक आहे, त्यांना लागू होणार नाहीत.
तसेच मुंबई पोलिस अधिनियमानुसार संबंधित तहसीलदार तथा कार्यकारी दंडाधिकारी यांच्या पूर्वपरवानगी शिवाय पाचपेक्षा जास्त व्यक्तींचा समावेश असलेल्या कोणत्याही मंडळीस (जमावास) किंवा मिरवणुकीस मनाई करण्यात आली आहे. या कालावधीत सभा, मिरवणुका, मोर्चा, मीटिंग, कार्यक्रम, रॅली इत्यादीबाबत स्थानिक पोलिस ठाण्याच्या अधिकाऱ्यांच्या सहमतीने संबंधित तहसीलदार तथा कार्यकारी दंडाधिकारी यांनी कायदा व सुव्यवस्था राखण्याबाबत योग्य तो निर्णय घेवून परवानगी द्यावी. अशी परवानगी तसेच लग्न मिरवणुका, धार्मिक मिरवणुका, आठवडेबाजार अगर प्रेतयात्रेच्या जमावास हे निर्बंध लागू होणार नाहीत, असेही जिल्हादंडाधिकारी श्री. यादव यांनी म्हटले आहे. हा आदेश 28 मे 2020 रोजीचे 00.01 वाजेपासून ते 11 जून 2020 रोजीच्या 23.55 वाजेपर्यंत लागू होईल.

धुळे, दि. 28:आठवडा विशेष टीम― स्वातंत्र्यवीर सावरकर यांच्या जयंतीनिमित्त जिल्हाधिकारी कार्यालयात आज सकाळी अभिवादनाचा कार्यक्रम आयोजित करण्यात आला होता. जिल्हाधिकारी संजय यादव यांच्या हस्ते स्वातंत्र्यवीर सावरकर यांच्या प्रतिमेचे पूजन करण्यात आले. यावेळी जिल्हा पशुसंवर्धन उपायुक्त डॉ. सुधाकर शिरसाट यांच्यासह विविध विभागांचे अधिकारी व कर्मचारी उपस्थित होते.

धुळे:आठवडा विशेष टीम―धुळे तालुक्यातील निकुंभे शिवारात चिंचवारकडे जाणाऱ्या जुन्या रस्त्यालगत डोंगर भागात काल (दि.१७) च्या भल्या पहाटे ४ वाजेच्या सुमारास हिंसा बिबट्याने गायीच्या वासराचा फडशा पाडला. या घटनेनंतर बिबट्याची परिसरात दहशत निर्माण होऊन शेतकऱ्यांसह ग्रामस्थांत घबराट पसरली आहे. तोंडाला रक्त लागलेल्या बिबट्याने परिसरात धुमाकूळ घालण्याअगोदर संबंधित वन विभागाने त्वरेने पिंजरा लावून बिबट्याचा बंदोबस्त करावा; अशी एकमुखी मागणी केली जात आहे.

याबाबत अधिक वृत्त असे की, निकुंभे शिवारातील गट नं.१३१/१ मधील शेतकरी चैत्राम पाटील यांच्या मालकीच्या शेतात दुधाळ गाय व तिचे वासरु नेहमीप्रमाणे बांधले होते. काल दि. १७ मे रविवार, रोजी भल्या पहाटे ४ वाजेच्या सुमारास हिंस्त्र बिबट्याने शेतात प्रवेश करुन गायीच्या वासरावर हल्ला चढविला. हल्ल्यात चवताळलेल्या बिबट्याने वासराच्या मानेचे लचके तोडत फडशाच पाडला. शेतमालक चैत्राम पाटील यांचा मुलगा प्रशांत पहाटे साडेपाच वाजता गायीचे दूध काढण्यासाठी आला तेव्हा हल्ल्याची ही घटना व मरुन पडलेले गायीचे वासरु त्याच्या निदर्शनात आले. याबाबत प्रशांत पाटील यांनी सांगितले की, बिबट्यांनी आतापर्यंत अनेक वेळा परिसरातील बुरझड, बोरीस, मेरगाव आदी भागात असे हल्ले केलेले आहेत. त्यामध्ये कितीतरी निरपराध पशू ठार झाले आहेत. या संदर्भात संबंधित वन विभागाच्या अधिकाऱ्यांना वेळोवेळी भेटून लेखी निवेदने ही दिली आहेत. परंतु बिबट्या अद्याप वन विभागाच्या हाती लागलेला नाही. चाणाक्ष बिबट्या चकमा देत, वारंवार जागा बदल करत, छुप्या पध्दतीने परिसरात वेगवेगळ्या भागात हल्ले करुन दहशत पसरवित आहे. संबंधित बोरीस ग्राम पंचायतीने सुध्दा याबाबत वन विभागास लेखी निवेदन दिले आहे. हिंस्त्र बिबट्यापासून परिसरात पशृंबरोबरच मानवी जीविताला मोठा धोका निर्माण बिबट्याने वासराचा फडशाबाबत वन अधिकारी यांना कळविण्यात आले असून, मृत वासराचा पंचनामा आदी प्रशासकीय कामकाज उशिरापर्यंत सुरुच होते. वन विभागाने एखादी मोठी दुर्घटना घडण्यापूर्वी बिबट्याचा तातडीने बंदोबस्त करावा. अन्यथा तीव्र आंदोलनाचा इशारा परिसरातील संतप्त शेतकऱ्यांनी दिला आहे.

पिंपळनेर (धुळे):आठवडा विशेष टीम― कोरोना विषाणूमुळे संपूर्ण महाराष्ट्रासह देशभरात लॉकडाउन आहे. त्यामुळे सर्वच बंद असल्याकारणाने शेतकऱ्यांनी पिकवलेला शेतमाल त्याला कावडीमोल दराने विकावा लागत आहे. त्यातच दुष्काळात तेरावा महिनाम्हणून शेतात असलेले पीक जगवणे शेतकऱ्याला जिकिरीचे झाले आहे. वास्तविक, गेल्या वर्षी अतिवृष्टीसह भरपूर पाऊस पडूनही सद्यःस्थितीला पाण्याची दयनीय अवस्था झाली आहे. कारण भूगर्भात मूळ बेसाल्ट खडकावर संपूर्ण गावाचे शिवार आहे. बंधाऱ्यात अडवलेल्या पाण्यावर मार्च व एप्रिल महिन्यापर्यंत परिस्थिती बरी होती. पण आज स्थिती बिकट आहे. म्हणून लाटीपाडा धरणातून पाण्याचे आवर्तन प्रवाहीत करून ८ नंबर चारीद्वारे पाणी सोडावे, यासाठी मलांजन ग्रा. पं. पदाधिकारी, साक्री पंचायत समितीचे माजी सदस्य प्रकाश अकलाडे, उभरे गावचे सरपंच, शरद सोनवणे आदींनी उपअभियंता, सिंचन विभाग, पिंपळनेर यांना निवेदन दिले आहे.