पाटोदा (बीड), १४ जुलै (गणेश शेवाळे): आष्टी मतदारसंघातील पाटोदा शहरात प्रशासनाने एका दिव्यांग पारधी कुटुंबाचे घर जेसीबीच्या साहाय्याने जमीनदोस्त केल्याची धक्कादायक घटना समोर आली आहे. या कारवाईत केवळ घराचेच नुकसान झाले नाही, तर परिसरातील सुमारे २५ ते ३० झाडांचीही कत्तल करण्यात आल्याचा आरोप पवार कुटुंबाने आणि स्थानिक नागरिकांनी केला आहे. या घटनेमुळे पारधी समाजात तीव्र संतापाचे वातावरण असून, प्रशासनाच्या या कारवाईविरोधात चौकशीची मागणी जोर धरू लागली आहे.
मिळालेल्या माहितीनुसार, पाटोदा शहरात वास्तव्यास असलेल्या पवार या दिव्यांग पारधी कुटुंबाच्या घरावर प्रशासनाने अचानक कारवाई करत ते पाडून टाकले. या कारवाईमुळे पवार कुटुंबाचा संसार उघड्यावर आला आहे. प्रशासनाने ही कारवाई करण्यापूर्वी कोणतीही पूर्वसूचना किंवा लेखी नोटीस दिली होती का, याबाबत साशंकता व्यक्त केली जात आहे. तसेच, घराच्या आवारात असलेल्या झाडांची तोड करण्यासाठी वनविभागाची किंवा संबंधित प्राधिकरणाची परवानगी घेतली होती का, हा प्रश्नही अनुत्तरित आहे.
या अनपेक्षित कारवाईमुळे पवार कुटुंब हवालदिल झाले असून, त्यांच्यावर मोठे संकट कोसळले आहे. प्रशासनाने केलेल्या या कारवाईच्या वैधतेवर आणि कार्यपद्धतीवर गंभीर प्रश्नचिन्ह निर्माण झाले आहे. कोणत्याही प्रकारची पूर्वकल्पना न देता थेट घर पाडण्याची कारवाई कोणत्या आधारावर केली, याचा जाब पारधी समाजाकडून विचारला जात आहे.
या प्रकरणी समस्त पारधी समाजाने तीव्र नाराजी व्यक्त केली असून, या प्रकरणाची सखोल आणि निष्पक्ष चौकशी करून दोषी अधिकाऱ्यांवर कठोर कारवाई करण्याची एकमुखी मागणी केली आहे. एका दिव्यांग कुटुंबावर अशा प्रकारे अन्याय करणे हे माणुसकीला धरून नाही, अशी संतप्त प्रतिक्रिया समाज बांधवांकडून व्यक्त होत आहे. या घटनेत मानवी हक्कांचे उल्लंघन झाले आहे का, या दिशेनेही तपास होणे गरजेचे असल्याचे मत व्यक्त होत आहे.
प्रशासनाचे मौन; आंदोलनाचा इशारा
या गंभीर प्रकरणावर संबंधित प्रशासकीय अधिकाऱ्यांनी अद्याप कोणतेही अधिकृत स्पष्टीकरण दिलेले नाही. प्रशासनाच्या या मौनामुळे संभ्रम अधिकच वाढत आहे. पवार कुटुंबाला न्याय मिळावा, या मागणीसाठी पारधी समाज संघटना आक्रमक झाली आहे. जर प्रशासनाने या प्रकरणी तातडीने लक्ष घालून पीडित कुटुंबाला न्याय दिला नाही, तर लवकरच पाटोदा तहसील कार्यालयासमोर आमरण उपोषण सुरू करण्यात येईल, असा इशारा संघटनेच्या पदाधिकाऱ्यांनी दिला आहे. आता या प्रकरणी प्रशासन काय भूमिका घेते आणि पवार कुटुंबाला न्याय मिळतो का, याकडे सर्वांचे लक्ष लागले आहे.
